احداث محمد محمود ..فرقان الثورة

بجد كم البجاحة والسفالة اللى حاصل مع اقتراب ذكرى احداث محمد محمود فوق قدرة الواحد على التحمل ..

احداث محمد محمود كشفت حقيقة منهج واهداف كل طرف ..

الثوار ..اللى نزلوا عشان يدافعوا عن المعتصمين واهالي مصابي وشهداء الثورة اللى تم الاعتداء عليهم وقتلهم وسحلهم والقائهم وسط الزبالة ..نزلوا بمنهجهم السلمي وهدفهم بتحقيق مطالب الثورة والعودة بها الى المسار الصحيح بعد ما عانت الثورة من المؤامرات اللى بتتم عليها ..نزلوا يدفعوا من دمهم الثمن تاني امام سلطة قمعية.

الاخوان ..اللى قرروا (بحكم الخيانة اللي في دمهم) انهم يغمضوا عينيهم عن اللي بيحصل في محمد محمود وعدم النزول في ظل تحالفهم واصطفافهم مع العسكر عشان تحقيق اهدافهم الخاصة بالكراسي والمكاسب الانتخابية بمنهجهم المعتاد من خيانة وتحالف مع السلطة واتفاقيات الغرف المغلقة والشغل تحت الترابيزة ومفيش مانع بالمرة ان الاخ / خيرت نائب مرشد الجماعة ان يطلع يخاطب الصحافة الفرنسية ويقولهم ان اللى بيحصل من الشباب ده هدفه تعطيل العرس الديموقراطي.

العسكر ..اللى افتكروا بشقهم لصفوف الميدان وتحالفهم مع الاخوان والصفقة اياها كده خلاص ..مفيش حاجة اسمها اعتصام وتظاهر واللي يعمل كده مفيش مانع من استخدام منهج العنف والقتل والتنكيل لتحقيق اهدافهم بالحفاظ على دولتهم وعلى مؤسسات الدولة زي ماهي وسط مباركة اخوانية طمعا في ان يرثوا دولة الظلم والقهر والاستبداد ويصبح العسكر اداة من ادواتهم مقابل خروج آمن والحفاظ على مكتسباتهم من يوليو52

قوم ياسيدي تحل ذكرى محمد محمود ونلاقي الاخوان اللى خانوا الثورة والثوار بدل المرة عشرة وباعوهم عشان الكراسي والسلطة وتركة الاستبداد اللى طمعوا فيها بيدعوا لاحياء ذكرى محمد محمود ..ذكرى خيانتهم ..ايه البجاحة والسفالة دي ؟

ويقوم العسكر اللى قتلوا الثوار في محمد محمود  على مدار ايام وضربوا وسحلوا اهالي ومصابي 25 يناير في بداية الاحداث بيدعوا لاحياء ذكرى محمد محمود ..ذكرى الدم اللي على ايديهم ..ايه البجاحة والسفالة دي ؟

طبعا انا ماجبتش سيرة الداخلية (جدع يا باشا جت في عين الواد)  وبيانها دلوقتي (المجد لشهداء النضال في محمد محمود) هي كمان ..لان بصراحة مش لاقي لفظ واحد اوصفها بيه

شباب الاخوان ..تحرروا

شباب الاخوان ..تحرروا 

انهاردة يوم عظيم في تاريخ بلدكم ..اوعوا تخلوا اليوم ده يفوتكم ..حرروا انفسكم ..وشاركوا في تحرير بلدكم من اي استبداد وفشل ..انزلوا مع اخوانكم اللي نازلين عشان حياة كريمة للكل.

بلاش تكونوا انتوا العائق امامهم بلاش تكونوا عقبة في طريق تقدم بلدكم ..بلاش تكونوا عامل مساعد لانهيارها.

الجماعة مفيش عندها مشروع اسلامي ..الجماعة لم تقدم شيء واحد على ارض الواقع يدعم فكرة المشروع الاسلامي ولو انتوا حريصين على الاسلام ..فكروا انتوا واشتغلوا انتوا عليه ..هم مفلسين ..والدين عندهم لا يمثل الى بضاعة يتاجرون بها لتحقيق مكاسب سياسية فقط.

ارجعوا لعقولكم وحكموها ..هل على مدار عام كامل شفتم اي تحسن في احوال الغلابة ؟؟ هل شفتم اي تحسن او بوادر للتحسن في ايا من مجالات الامن والغذاء والصحة والتنمية؟؟

انا مش عايز اليوم ده يفوتكم ..انا عايزكم تكونوا مشاركين فيه مع باقي الشعب عايزكم تكونوا جزء منه ..عايزكم تتعاملوا بوجه واحد مش وجهين زي ما علموكم..مش عايز اشوفكم منبوذين بعد كده في المجتمع ..مش عايزكم ترجعوا تاني تحت الارض وفاقدين الثقة في الجميع.

انزلوا وثوروا مع الثائرين ..ضد الظلم والاستبداد ..حرروا ارادتكم ..

اذا لم تقتنعوا ..يبقى طلب اخير ..اليوم التاريخي ده بلاش يكون فيه دم واحرصوا على دماء اخوانكم ..بلاش تروحوا تفدوا المقرات بدمائكم ..مش هنستحمل نشوف دم بيسيل عشان يحمي شوية طوب ولا هنستحمل دموع اهاليكم وحرقة قلوبهم عليكم.

عايزين تنزلوا تتظاهروا وتايدوا ..انزلوا ..بعيد عن اي اماكن ممكن تتسبب في اسالة دم جديد مش لازم تتظاهروا قريب من تظاهرات الثوار ..او المقرات ..ده مش واجبكم ..واجبكم حقن الدماء ..واجبنا كلنا حقن الدماء 

واحد لمون

عصرت لمون وانتخبت مرسي ؟؟ 

وبعد ؟ هل صدق في وعوده معك ؟ هل شعرت باى تحسن او استقرار او اى توجه نحو ديموقراطية سليمة ؟ 

هل بدات تشعر بان اهداف ثورتك بدات تتحقق ؟ اذا ماذا حدث ؟؟ 

الذي حدث ببساطة ان مرسي وجماعته قرروا ان يرثوا كل تركة مبارك من استبداد و ديكتاتورية وقمع و اقصاء وقتل و تعذيب وانتهاك وتشويه وتدليس وظلم اما عن السرقة فلن اتحدث عنها لان مرسي وجماعته لم يثبت عليهم هذا الفعل وان كانوا قد استبدلوه بشيء شبيه وهو الاهمال وعدم كفاءة ادارة موارد الدولة رغبة منهم في تنفيذ مشروعهم للتمكين او اخونة الدولة مما يتسبب في اهدارها كما لو كان يتم سرقتها.

اذا كيف يتم وقف الانهيار المتوقع للدولة على يد مرسي وجماعته ؟؟ 

لا سبيل سوى اتحاد الجميع في معارضة قوية تقف امام مرسي وجماعته لمنع هذا       الانهيار وهنا تكمن المشكلة ..الاتحاد 

الشباب الذي كان شعلة الثورة يعجز تماما عن الاتحاد في كيان واحد ..القوى الشبابية منهمكة في المزايدة على بعضها البعض والتنظير ورفض كل محاولات تكوين هذا الكيان ومن ثم ظهرت كيانات سياسية مثل الدستور و مصر القوية و التيار الشعبي ليحتوي الكثير من الشباب الذي شارك في الثورة دون ان يكون هناك كيان سياسي يمثله ولكن طليعة الشباب الثوري ومن دعا الى الثورة لا يزال بعيدا عن اى كيانات ..يرفضها ..يسخر منها ..يتمنى فشلها ..مما يشكل انقساما للمعارضة في وقت غير ملائم بالمرة لمثل هذا الانقسام وبالتالي فالقوى الشبابية بانقسامها تضعف ويتشتت جهدها ونضالها وتفقد المعارضة الكثير بهذا الانقسام في مواجهة النظام المستبد.

اما عن القوى المتمثلة في الاحزاب المعارضة للنظام الاخواني فقد كونت جبهة الانقاذ وهي محاولة اراها جيدة ومفيدة على الرغم من تحفظي على بعض الاحزاب المشاركة ولكنها اسست لمعارضة مجمعة متفقة على اهداف واحدة مشروعة تماما لا نختلف عليها نتفق جميعا على النضال من اجلها ولكن كالعادة فالشباب الثوري من نشطاء سياسيين وحقوقيين وصحفيين يرفضها ويتحفظ على ادائها ويسخر من كل محاولاتها .

الى متى اذا هذا الانقسام في المعارضة ؟ 

اليس من الممكن ان نعصر لمون على جبهة الانقاذ طالما تحمل نفس مطالبنا ؟ هل اللمون فقط يتم عصره في مواجهة شفيق كشخص وليس نظاما كرهناه ورفضناه ونحلم ان نتخلص منه ؟ هل من الممكن ان نعصر لمون وننضم جميعا للجبهة ونصحح اخطائها ونعدل مسارها ونطور من اساليبها في مواجهة هذا النظام بدلا من المحاولات لتكوين كيان آخر لا نعلم اذا كنا سننجح في تكوينه ام لا ؟ 

فلنكتفي بهذا القدر من التشتت ونتحد في كيان نواجه به الاخوان والا سنشاهدهم يقودون مصر نحو الهاوية او الى حكم عسكري جديد بمباركة الشعب الذي انتظر كثيرا وجود كيان يلتف حوله ولم يجد في النهاية سوى العسكر.